Қазақстанда республикалық «Бір өңір – бір кітап» науқаны ҚР Мәдениет министрлігінің қолдауымен ҚР Ұлттық академиялық кітапханасы және ҚР Кітапханашылар Ассоциациясы бастамасымен 2007 жылдан бастап өткізіліп келеді.

Осы орайда, Меркі аудандық орталық кітапханасында «Бір өңір – бір кітап» науқаны өтті. Науқанның мақсаты – ұлттық әдебиетіміздегі ең үздік деген туындыны оқу және насихаттау, Қазақстанның әдеби мұрасын зерттеуге деген қызығушылықты дамыту, қоғамның оқуға деген ықласын көтеру, сонымен қатар жас өспірімдердің зияткерлік-рухани дамуына ықпал жасау.

Республикалық деңгейдегі дәстүрлі акция биыл оқырмандар арасында он жетінші мәрте ұйымдастырылуда.

Жиынға арнайы шақырылған «Жақсымбет» мешітінің имамы Қасымалиев Қыдыралы «Исламдағы білім» тақырыбында уағыз-насихат жүргізді.

Уағыз барысында Алла Тағаладан түскен ең бірінші аят «Оқы!» болғанын, пайғамбарымыз Мұхаммедтің (оған Алланың салауаты мен сәлемі болсын): «Білім - әрбір мұсылманға парыз», - дегенін жеткізді.

Уағыз соңында жиынға қатысушылар сұрақтарын қойып, тұшымды жауаптарын алды.

Меркі аудандық «Меркі ата» мешітінің баспасөз қызметі