Бүгін қасиетті жұма күні Тараз қаласына жаңа бас имам тағайындалды. Ресми шараға ҚМДБ-ның Жамбыл облысы бойынша бас имамы Бейбіт Мырзагелдиев арнайы барып, жамағат алдында Бас мүфти Наурызбай қажы Тағанұлының бұйрығын оқыды.

Көпшілікке жаңа тағайындалған "Кеңесхан қажы" мешітінің бас имамы Дауренбеков Орынбасар Орымбайұлын таныстырды. 

Облыс имамы бұл уақытқа дейін Тараз шаһарының бас имамы қызметінде  болған Амантай Садиевке алғыс хат табыстады. Өңірге сіңірген еңбегін тілге тиек етіп, білім жолына сәттілік тіледі. Ал жаңа қызметке келген маманға жемісті жұмыс тілеп, игі ниетін білдірді.

Айта кетейік, Орынбасар Дәуренбеков Шымкент қаласындағы "Ықылас" жастар қоғамдық бірлестігінің Араб тілі және тәрбие ісінің қызметкері, Шымкент қалалық №52 мектептің араб тілі мұғалімі, ҚМДБ Бас мүфтидің көмекшісі, Алматы қаласындағы "Таугүл-3" мешітінің бас имамы, Алматы қаласы, Алатау ауданындағы "Бекет-ата" мешітінде бас имам қызметтерін атқарған. Ислам институты мен "Нұр-Мүбәрак" университетін бакалавр және магистратура бойынша тәмәмдаған исламтанушы. 

Ақерке БЕКҚҰЛОВА

"Һибатулла Тарази" мешітінің баспасөз қызмет