Ұлтты ұйыстырған, күллі мұсылманды сағындыра жеткен ораза айт мерекесінің құрметіне "Һибатулла Тарази" мешітінде жамағаттың ұйымдастыруымен 1 миллион теңгеге 300 адамға киім-кешек сыйға берілді. 

Айт мерекесін өскелең ұрпаққа насихаттау, мерекелік көңіл-күйді қалыптастыру мақсатында жасалған шараға ҚМДБ-ның Жамбыл облысы бойынша бас имамы Бейбіт қажы Мырзагелдиев, мешіт қызметкерлері мен жамағат қатысты.

Отбасыларға, балаларға бас киім, көйлек, аяқ киім, шалбар, футболка, жейде сынды түрлі киімдер берілді. Жап-жаңа киім киген балалар қуанып, ата-аналары алғыстарын жаудырды. Айта кетейік, киімдер тек балаларға ғана емес, ата-аналарына да сыйға тартылды. 

Игі бастама жайлы Бас имам БАҚ өкілдеріне сұқбат беріп: "Біз балалардың төл мерекеміз айт мейрамын ерекше асыға күткенін қалаймыз. Іс-шара осы күннің берекесін, ғибратын түсінсін деп, әрі мұқтаж отбасыларға көмек болсын деген ниетпен ұйымдастылыды" - деп атап өтті.

Ақерке БЕКҚҰЛОВА

"Һибатулла Тарази" мешітінің баспасөз қызметі