ҚМДБ-ның Төрағасы, Бас мүфти Наурызбай қажы Тағанұлы: «Жұқпалы індеттің таралуының алдын алу мақсатында мешіттерде, дәмханаларда, қоғамдық орындарда т.б. мекемелерде жиналып ауызашар беруді уақытша тоқтатуға шақырамыз» - деген, тапсырмасын ескере отырып, жанұясымен бірге сыртқа шыға алмай отырған мұқтаж отбасылар мен ауыз бекіткендер үшін ауызашар сауабынан үміт еткен азаматтардың қайырымдылық іс-шарасы орталық «Һибатула Тарази» мешітінің жанынан құрылған еріктілермен бірге іске асырылуда.

 «Һибатулла Тарази» мешітінің ұйымастыруымен ауызашар дастарханы (тамақ, салат, тәттілер, сусындар) қала тұрғындарының үйіне жеткізілуде. Атап айтсақ, Шөлдала ауылы, Қарасу 5-ші  мөлтек ауданы №25-ші және Төлеби көшесінің бойындағы «Юность», «Огонек» жатақханаларының ауыз  бекіткен тұрғынарына, т.б. ыстық тамақ берілді.

Жалпы бүгінгі күнге дейін ораза басталғалы 1050 отбасыға ауызашар берілді. Іс-шараны ҚМДБ-ның Жамбыл облысындағы бас имамы Бейбіт қажы Мырзагелдиевтің өзі бастап, ауыз бекіткен көпшілікке ас-аухат таратуда. 

Карантин жағдайында жамағатты жинамай, осылай ауызашуға арналған дастарханды үй-үйге жеткізу ең тиімді жол болып отыр. Тұрғындар да бұл игілікке шын қуанып, разылықтарын білдірді. 

Ақерке БЕКҚҰЛОВА,

"Һибатулла Тарази" мешітінің баспасөз қызметі