ҚМДБ-ның Жамбыл облысы бойынша өкілдігі мен «Уақып» корпоративтік қайырымдылық қоры бірлесе отырып  жаңа оқу жылы қарсаңында  «Мектеп сөмкесі» қайырымдылық іс-шарасын ұйымдастырып, әлеуметтік жағдайы төмен отбасыларға қуаныш сыйлап, білім іздеген бүлдіршіндерге көмек көрсетті.

Қайырымдылық шараларының қара шаңырағына айналған облыстық орталық  «Һибатулла Тарази»  мешітінде өткен іс-шара аясында Тараз қаласындағы 80  оқушыға,  оқуға қажетті құрал-жабдықтар салынған 80  сөмке таратылды.

Іс-шараға орталық "Һибатулла Тарази" мешітінің наиб имамы Жапек Ғалымбек,  «Уақып» корпоративтік қайырымдылық қорының президенті Айтбай Қайрат мырза  қатысып, оқушылар мен ата-аналардың қуанышына куә болды.

Игі шараның шымылдығын ашқан облыстық «Һибатулла Тарази» мешітінің наиб имамы Жапек Ғалымбек  асыл дініміздегі оқу-білімнің орны жайлы айта келе, жас бүлдіршіндерді оқуда озат болуға шақырды.

Көмек алған барлық оқушылардың ата-аналары шараны ұйымдастырушыларға шексіз алғыстарын жеткізді.

«Һибатулла Тарази» мешітінің Баспасөз қызметі