Бүгін Жамбыл облысындағы орталық «Һибатулла Тарази» мешітінде қала, аудан бас имамдарының бір апталық семинары басталды. Мұнда 30-ға жуық имам қатысуда.
Семинарға еліміздегі дін саласындағы білікті мамандар шақырылды. Семинарда қазіргі таңдағы дініміздегі өзекті мәселелер мен түйіткілді сұрақтарды ортаға салып, жан-жақты талқылап, ұстаздардың біліктілігімен бөлісу үшін ҚМДБ-ның оқу-ағарту бөлімінің меңгерушісі Смаил Сейтбеков мазхабтар тарихынан лекция оқыса, Алматы қаласы орталық мешітінің найб имамы Ерсін Әміре теріс ағымдардың шығу тарихына тоқталады, Алпысбаев Ерғали Құран ғылымы пәнінен дәріс оқиды.
Шу аудандық «Төле би» мешітінің бас имамы Аят Дыбысұлы аудандық орталық мешітте ауданға қарасты барлық ауылдық мешіттің молдалармен кездесу өткізді. Аудан имамы жиналысқа қатысқан барлық молдаларға ҚМДБ-ның бір қатар тапсырмаларын міндеттеді.
Атап айтқанда, сауат ашу курсы жұмысын жандандыру, мешіттегі тәртіпті қадағалау, тазалыққа көңіл бөлу. Келген жамағатқа немесе мешіт жамағаттарына шынайы жанашырлық танытылып, оларға дөрекі сөйлемей, мешіт қызметкерлері тарапынан жіті көңіл бөлініп, әдеп пен құрмет көрсетіліп, көркем уағыз айтып, жылы қабақ танытып, шынайы жанашырлықпен сұрағына жауап беруін, молдалар арасында қарым-қатынас нығайту сынды бір қатар тапсырмалар берілді.
Шу ауданындағы Бірлікүстем ауылында жылдағыдай осы жылы да сәуір айында бесін намазынан соң мешіт қызметкерлері мен мешіт жамағаты және ауыл тұрғындары бірігіп ауылда алғашқылардың бірі болып сенбілік тазалығын өткізді. Мешіттің айналасын және зират басын тазалап ағаштар отырғызылып, сенбілік өткізілді.