Жамбыл облысы әкімдігінің дін істері басқармасы мен «Дін проблемаларын зерттеу орталығы» КММ-нің жұмыс жоспарына сәйкес, Шу ауданында «Дін мен заң сабақтастығы» тақырыбында іс-шара ұйымдастырылды.

Арнайы іс-сапармен келген мамандар «Төле би» мешітіне тұрақтап, жергілікті жамағатпен кездесті. Шара барысында аталмыш мешіттің имамы Талғат Кәрібайұлы қонақтарды таныстырып, олардың сапарының мақсаты мен маңыздылығын атап өтті.

Кездесу барысында ауыл тұрғындарына «Әлеуметтік желідегі дүниежүзілік террористік идеологтардың қатері» тақырыбында түсіндіру жұмыстары жүргізілді. Әлеуметтік желілер арқылы таралатын экстремистік идеялардың қауіптілігі мен олардың қоғамға тигізетін зияны, сонымен қатар, интернет кеңістігінде сақтық шараларын сақтау, күмәнді ақпарат көздерінен аулақ болу және діни сауаттылықты арттырудың маңыздылығы ерекше мән берілді.

Шара соңында көпшілік көкейдегі сұрақтарын қойып, дін мен заң талаптарына сай өмір сүрудің өзектілігі жайлы пікір алмасты.

Шу аудандық «Жәми» мешітінің баспасөз қызметі.