Жамбыл облысы Байзақ ауданы Байзақ ауылдық С.Абланов мектебінде аудан бас имамы Қанат Әділханұлы оқушылармен кездесіп, «Анаға құрмет» тақырыбында насихат айтты.

Қанат Әділханұлы: «Ана – ардақты есім. Дүниеде Ұлы Жаратушыны қоспағанда ананың мейірімінен асатын мейірім жоқ деуге болады. Сондықтан ананың орны әрқашан бір бөлек.

Ана – дүниедегі ең ардақты жан. Ол – әлемдегі барша ізгілік пен мейірімнің, парасат пен тағылымның көрсеткіші. Ұлы Алла Тағала қасиетті Құранда: «Адамдарға ата-анасына жақсылық жасап, қарайласуды бұйырдық. Анасы қиыншылық үстіне қиыншылық көріп, оған жүкті болды. Екі жылда омыраудан айыруы (емшектен шығару) бар», – дейді.  Кез келген адамның әдептілігі мен жан-дүниесінің сұлулығы ең алдымен балаға ақ сүтін беріп, әлпештеп өсірген ана жүрегінің жылуынан басталады. Бала бойындағы ең жақсы қасиеттер де ең алдымен анадан тарайды. Әлемдегі ең кешірімді, ең мейірімді жан – ана. Оның мейірімділігінде шек жоқ», - деді.