Меркі ауданына қарасты барлық мешіт қызметкерлері қасиетті жұма күні «Дін мен Дәстүр – егіз ұғым» тақырыбында уағыз-насихат жүргізді.

Аудан имамдары: «Ата – бабамыз сан  ғасырлар бойы Құран Кәрім аяттары мен ардақты Пайғамбарымыз Мұхаммедтің (оған Алланың салауаты мен сәлемі болсын) сүннет жолын берік  ұстанды. Соның ішінде шариғатымыздағы  іс-әрекет  пен  үкім бойынша Имам Ағзам Әбу Ханифа мәзһабы, ал діни танымдық мектебі иман, сенім тұрғыда имам әл-Матуриди қалыптастырған жолмен келеміз.  Имам Әбу Ханифа негізін қалаған Ханафи мәзһабында әдет-ғұрып шариғи қайнар көздердің бірі деп танылады.

Қасиетті Ислам  діні барша адамзат баласына түскен әлемдік дін және  Ислам  жер бетіндегі барлық  қауымға  ақиқатты танытып, әрбір ұлт пен ұлысқа өзінің салт-дәстүрлерін сақтай отыра ізгілік жолымен жүруді насихаттайды. Ардақты Пайғамбарымыз да (оған Алланың салауаты мен сәлемі болсын) араб халқының исламға дейінгі дәуірдегі шариғатқа қайшы келмеген әдет-ғұрыптарының сол қалпында қолданылуына тыйым салған жоқ.»,  - деп өзіміздің Қазақи құндылығымдызды қастерлеуге , дәстүрімізді дәріптеуге шақырды.

Алла Тағала  қасиетті дінімізді бекем ұстанатын,   дәстүрімізді құрметтейтін ел болуымызды нәсіп қылсын, жұма күні тілеген дұға-тілектерімізді қабыл қылсын.

Меркі аудандық «Меркі ата» мешітінің баспасөз қызметі