Құранда аң аулайтын иттермен ұсталынған жануарлар мен құстардың еттері рұқсат етілген болып табылады делінген. Аң аулау кезінде шанышқылайтын-кесетін қарулардың кез-келген түрін, сондай-ақ, атыс қаруын да қолдануға болады. Фикх көзқарасы бойынша, жануарды союдың екі түрі болады: ықтиярлы және мәжбүрлі. Ықтиярлы сою – шариғат талаптарына сәйкес үй жануарларын сою.

Мәжбүрлі сою – жабайы жануарларды кез-келген аң аулау қаруының көмегімен не болмаса аң аулайтын иттер мен құстардың (сұңқар) көмегімен сою болып табылады.
Ықтиярлы сою мүмкін болмаған жағдайда, мәжбүрлеп сою іске асады. Мысалы үшін, егер қашып кеткен үй жануарын ұстау мүмкін болмағанда немесе ол құдыққа құлап, оны шығару мүмкін болмаса, онда бұл жағдайда жануарды аң аулайтын қарудың көмегімен өлтіруге болады.

Аң аулауда келесі қарулар түрін қолдануға болады: садақ, жебе, найза, пышақ, мылтық, карабин және басқа да аң аулау атыс қаруын, сондай-ақ, сұңқар, қаршыға, қыран сияқты аң аулайтын құстар мен иттер де пайдаланылады. Қасиетті Құранда былай айтылған: «Және де Алланың өздеріне білдіргенін үйретіп, тәрбиелеген жыртқыштарды: Алланың атын айтып (аңға) салсаңдар, сендер үшін ұстағандарын жеңдер» (5:4).

Ауланып жүрген жануар аң аулайтын қарумен өлтірілсе, бұл жағдайда оның тамағын кесудің қажеті жоқ. Яғни, бұл жануардың етін тамаққа пайдалана беруге болады.  Алайда, егер атылған жануар өлмей тұрып аңшы қасына жетсе, онда оны бауыздап алу керек.