25 Қазан - Қазақстанда Республика күні, мемлекеттік мереке. 1990 жылы қазан айының 25-і күні Қазақ КСР Жоғарғы Кеңесінің шешімімен «Қаз КСР-нің мемлекеттік егемендігі туралы» декларация қабылданды. Сол сәттен бастап-ақ егеменді Қазақстан өзіндік көзқарасы бар жеке мемлекет ретінде таныла бастады. Қабылданған декларация Қазақстанның болашақ тәуелсіздігінің іргетасы саналды. Бұл декларацияның қабылдануымен егемендігін мәлім ететін жеке территориясы, азаматтығы, мемлекеттік бюджеті, халықаралық қатынастардағы дербестігі, мемлекеттік рәміздерімі бекітілді. Қазақстанның егемендігі және территориясының тұтастығы саяси, құқықтық және экономикалық тұрғыдан дәйектелді. Бұл акт арқылы әлем картасындағы жаңа мемлекет – Қазақстан Республикасының негізі қаланды.

Қазір бұл күн мемлекеттік дәрежеде атап өтіліп, мереке ретінде тойланады. 2001 жылы 13 желтоқсанда қабылданған «Қазақстан Республикасындағы мерекелер туралы» №267 заң бойынша бұл күн мемлекеттік мерекелер қатарына қосылды.

Осы орайда, Меркі аудандық «Меркі ата» мешітінің имамы Азамат Берікұлының басшылығымен Республика күніне аудан тұрғындарына мемлекеттік ту сыйға тартылды.

Аудан орталығында бас имам көмекшілерімен аудан тұрғындарына мемлекеттік туды сыйға тартып, мерекелік көңіл-күй сыйлады. Аудан тұрғындары ризашылықтарын білдірді. Алла Тағала Елімізге, Жерімізге амандық берсін!

Меркі ауданждық «Меркі ата» мешітінің баспасөз қызметі