Құран – Алланың берік тұтқасы әрі ашық нұры. Ол тұтқадан ұстағанды Алла Өзі сақтап, ол нұрға ергендерді Алла Өзі құтқарады. Авторы Дара әрі Дана болған кітапты әрбір ашқан сайын жаңадан оқығандай әсер алып, тамсанасың, таңғаласың. Адамзатты тура жолға бастауға жіберілген, кемел адам қалыптастыратын қағидалардан тұратын Құранның бойында бізге құпия қаншама қазына жатыр десеңізші...

Міне, осы қасиетті Құран Кәрімді мәнерлеп оқу бойынша біздің келешегіміз болған жасөспірімдер арасында Шу ауданы "Жиенбет Жексенбай" мешітінде ауқымды іс-шара өтті.

Мешіт имамы Шүкірәлі Бердібековтың ұйымдастыруымен жасөспірімдер арасында өткен Құран сайысы балалардың Құран жаттауға деген ықыластарын одан әрі арттырған-ды. Білімді мыңды жығар білімпаздар арасынан оқ бойы озып шыққан жеңімпаздарға бағалы сыйлықтар табыс етілді.

Жарысқа қатысқан барлық балаларға қаржылай сыйлықтар берілді. Шара соңында мешіт ауласында құдайы ас беріліп, ауданның бас имамы Бахтияр Амиреев уағыз айтты.

Шара соңында имамдар аталған ауылда тұратын асыраушысы марқұм болған көпбалалы ананың үйін зиярат етіп, балаларға мектепке қажетті құрал-жабдықтар үлестірді. Көпшілік разылықтарын білдіріп, баталарын жаудырды.

"Жиенбет Жексенбай" мешіті Құран жарысына демеуші болған азаматтарды да алғыс хатпен марапаттап, береке тілеп қайтты.

Шу аудандық "Жәми" мешітінің баспасөз қызметі