Тозаққа түсудің әуелгі себебі күпірлік болса, одан құтылудың басты жолы – имандылық, сосын игі амалдарды барынша көбірек істеу. Алла тағала Құранда иман келтіргендерін алға тартып: «Раббымыз! Иман келтірдік, күнәларымызды кешір және бізді от азабынан сақта», – деп дұға қылғандарды мысал еткен.

Сондай-ақ арнайы мәтіндерде келген тозақтан құтылудың шаралары туралы айтар болсақ, Жабир ибн Абдуллаһ (Алла әкесі екеуіне разы болсын) риуаят еткен хадисте Пайғамбар (с.а.с.): «Алла тағала: «Ораза – ол арқылы тозақтан қорғанатын қалқан», – деп айтты», – дейді.

Алла тағала: «Раббысының құзырынан қорыққанға екі жаннат бар», – деген. Алла елшісі (с.а.с.): «Қашан пенде аяқтарын Аллаһ жолында шаңға былғаса, оған тозақ оты тимейді», – деген.

Әбу Һурайра (Алла оған разы болсын) риуаят еткен хадисте Пайғамбар (с.а.с.): «Алла тағала (періштелерге пенделері туралы) Өзі жақсы біліп тұрса да: «Олар (Менен) не нәрседен пана сұрайды?», – дейді. Олар: «Тозақтан», – дейді. «Олар оны көрген бе?» – дейді. «Жоқ, уа, Раббы! Олар оны көрмеген», – дейді. «Егер олар оны көрсе, қалай болар еді?» – дейді. «Егер оны көрсе, бұдан да қатты қашып, (бұдан да) қатты қорқар еді», – дейді. Сонда (Алла тағала): «Мен оларды кешіргеніме сендерді куә етемін», – деп айтады», – дейді.
Алладан тозақ азабынан пана сұрауға қатысты дұғалар Құран аяттары мен Пайғамбарымыздың (с.а.с.) хадистерінде өте көп келген.

Ең бергісі, Пайғамбар (с.а.с.): «Құрманың жартысымен болса да тозақтан сақтаныңдар», – деп айтқан.