Мінекей, асыға күткен құт айы Рамазан да өзінің соңғы күндерін өткізіп, қасиетті мол Қадір түніне жеттік. Алла Тағала оны берекелі етті, онда Құранды түсіріп, басқа түндерден  ерекшеледі. Аудандық «Қордай» мешітінің жамағаты мың айдан қайырлы, дұғалар қабыл, сауабы 83 жылмен тең болатын қасиетті Қадір түнін ерекше құлшылықпен қарсы алды. Қадір түнін мешіт ұжымы жоғары дайындықпен өткізді.

Рамазан айы бойы үзілмеген ауызашарда Қадір түнінде жомарт бауырларымыздың демеуімен өз жалғасын тауып, Қадір түнінде де ауызашар берілді. Құптан намазына мешітімізге келген  жамағат сыймады. Қасиетті түнде Рамазан айы бойы түсірілген Құран хатымы аяқталып, хатым дұғасы жасалынды.

Тарауих намазы арасында аудандық «Қордай» мешітінің имамдары дайындаған сұрақ- жауап айдары болды. Бас жүлдеге Құран Кәрім тәпсірі және 20 000 теңге,  екінші күрделі сұраққа жауап бергенге 10 000 теңге, Алла елшісінің  (с.ғ.с) өмірбаяны сияқты  сыйлықтар жасалып, үлкен-кіші болып білім сайысына жамағат белсене қатысты. Тарауихтың біреуін қарттығына жасы жетсе де, денсаулығы сыр берседе қаза етпеген, мешіттен ораза бойы табылған Берік Скақов ақсақалға да мешіт атынан сыйлық жасалынды. Мешіт имамдары кешті өзінің уағыздарымен безендіріп жалғастыра кетті.

Дін жанашырларының демеушілігімен асханада жиналған жамағатқа сәресі дастарханы жайылып, бауырларымыз  ауыздарын бекітіп, келесі күннің оразасына ниет етті. Жиналған қауымның сөзіне жүгінсек бұл түн ерекше түн, рухани кемелдену түні, мұсылмандық бауырмашылдықты нығайтатын түн, иман деңгейінің көтерілуіне үлкен септігін тигізген түн болды деп  разылықтарын білдіріп, алғыстарын айтып жатты. Таң намазы оқылып, дұға жасалып, жамағат үйлеріне тарқасты. Раббымыз осындай ұлық күнде жасалған ғибадат құлшылықтарымызды, дұғаларымызды қабыл еткей!

Аудандық «Қордай» мешітінің баспасөз қызметі