Абай атамыз: «Алланыңөзі де рас, сөзі де рас. Рас сөз ешуақытта жалған болмас» деген еді. Мінеки, қаншама ғасыр өтсе де бірде-бір әрпі өзгермеген қасиетті кітап Құран Кәрім адамзаттың игілігі үшін қызмет етіп келеді. 

Асыл дініміздің қайталанбас құндылығы, тірегі болған, екі дүние бақытына жеткізер Алланың хақ үкімі және сөзі Құран екені баршамызға аян. Ардақты елші Пайғамбарымыз (с.а.с), «Сендердің ең жақсыларың, Құранды үйреніп оны өзгелерге үйреткендерің»- дегендей, ҚМДБ Жамбыл облысы бойынша өкілдігінің мұрындық болуымен және аудандық «Қордай» мешітінің ұйымдастыруымен Қордай ауданы, Масаншы елді мекенінде облыс бойынша Құран жарысы болып өтті.

Қатысушыларды сынақтан өткізуге, ҚМДБ-ның Жамбыл облысы бойынша өкілі Данияр қари Жұмабаев және «Һибатулла Тарази» мешітінің ұстазы, мысырлық Сулеймен ұстаз және Асқар Ақмамбетов өздерінің әділ бағаларын беруге әділқазылар алқасының құрамында болды. Осы сауапты да тағылымы мол іс шараның өтуіне ҚМДБ-ның Жамбыл облысы бойынша өкілі Данияр қари Жұмабаев төрағалық жасап, сайысқа қатысушы шәкірттерге және жамағатқа Құран Кәрімді өз ережесіне сай тәжуидпен оқи білудің сауабы жөнінде мағыналы уағыз айтып, жарысқа қатысушыларға сәттілік тілеп, жарыс ережелерімен таныстырып өтті.

Жалпы бұл игі жарысқа облысымыз бойынша мектеп жасындағы  оқушылардан бастап үлкен-кіші жалпы саны 72 азамат қатысты. Құран жарысы 20 параны жаттаған және Құран кәрімді толық жаттаған азаматтар арасында өтті. Баға беру барысында үміткердің барлық қырына: оқу мәнерінен бастап, дыбыстарды шығаруы мен тәжуид ережелерін сақтауына аса мән берілді.  Бірінші айналымда қарилардың баршасы сыналып,  20 пара бойынша жарты финалға 8 үміткер, ал толық жаттау бойынша 24 үміткер шықты.

30 пара бойынша ақтық сынға 5 қари тағы да алдыңғылар қатарында болды. Қорытынды жарысқа шыққан қариларға қойылған сұрақтар әлбетте алғашқыдан өзгеше, қиындау болғанын жиналған жамағаттың баршасы бағалады. Құранды толық жаттағаны бойынша 1-ші орынды Юнуза Рустам йеленіп, жүлде ретінде скутер сыйға берілді. 2-ші Люва Арафат, 3-ші орынды Масаншы ауылының тумасы, 15 жасар   Санвазов Алим, 4-ші орынды Жақсылықов Еркебұлан йеленсе,  20 пара жаттау бойынша 1-ші орынды Нұрмұхамет Омар, 2-ші орынды  Джунуров Юсуф, 3-ші орынды Хусей Вахаб йеленді. Әділқазылар алқасы қатысушыларға, ұйымдастырушыларға өз алғыстарын білдірді.

Жүлделі орындарға йе болғандарға да, барлық қатысушыларға да естеліккке сыйлдықтар үлестірілді. Алла Тағала қасиетті Құранды кітап күйінде ғана емес адамдар арқылы, осындай қариларымыз арқылы  сақтап отырады. Сондықтан, бәйгені ұйымдастыру да  Алла жолындағы мәртебелі қызмет.

Аудандық «Қордай мешітінің баспасөз қызметі