Дінсіз біреу діндарға келіп былай депті: “Молдеке, мен өмірімде көп күнәға батып ем. Күнәмнан арылтып, Алланың кешірімін әперші”. “Сенің жүрегің бес лай арық құйып жатқан тоған секілді екен. Тоғанның лайланғаны сондай, ботана суын ағызып қана тазартуға болады” – депті сонда діндар.

“Ол не қылған бес арық?”. “Ол жамандық пен надандық әкелетін бұлақтар ғой” – депті діндар. “Бірінші арық – сенің көздерің. Мұсылман әйелдерге бұзылған көзіңді сүзе берме. Екінші арық – сенің аузың. Егер ораза ұстап, дұға оқып жүрсең – Аллаға жағасың. Шариғат қаламағанды ішіп-жеуші болма. Үшінші арық – бұл сенің миың, сені әділетсіз, залым қылып, менмендік пен өркөкіректікке бастап жүрген – сол. Төртінші арық – сенің аяқтарың, сені көргенсіз жолға бастап, жын- ойнақ пен қызойнаққа апарып жүрген – сол. Бесінші арық – кеселді сөз бен өсек теріп жүрген сенің құлағың. Осы бес арықты ағызып жіберсең – шықтай тұнып, тазарып шығар едің”.

Сонда әлгі адам: “Екінші рет қайталамаймын, я Жаратқан Ием, өзің жар бола гөр!” – деп, тәубесіне келген екен дейді.