ҚМДБ «Зекет және қайырымдылық» қорының ұйымдастыруымен жүзеге асып жатқан «Мектепке жол» жобасы аясында Сарысу аудандық орталық мешітінде игі іс-шара ұйымдастырылды.

Жоба барысында 19 балаға жаңа оқу сөмкелері мен мектепке қажетті кеңсе тауарлары табысталды.

Іс-шараның басты мақсаты – жаңа оқу жылына дайындық барысында балаларға қолдау көрсетіп, олардың білім алуға деген ынтасына демеу болу, сондай-ақ әрбір балаға қоғам тарапынан қамқорлық бар екенін сезіндіру.

Мектеп – баланың білім мен тәрбие алып, болашағына жол ашатын маңызды орта. Сондықтан жас өскіндердің сапалы білім алуына жағдай жасау – баршамызға ортақ міндет. Бір балаға берілген сөмке мен оқу құралдары қарапайым дүние болып көрінгенімен, оның артында үлкен қуаныш, ата-ананың алғысы және баланың жаңа оқу жылына деген ерекше ынтасы жатыр.

Осындай игі бастамалар қайырымдылықтың қоғамдағы маңызын арттырып, өзара жанашырлық пен бауырмалдықты нығайта түседі.