Барлық мақтау әлемдердің Раббысы болған Алла Тағалаға тән. Ардақты Пайғамбарымызға (оған Алланың салауаты мен игілігі болсын) оның отбасы мен сахабаларына Алланың салауаты мен сәлемі болсын! Ислам діні адамның рухани өміріне ғана емес, денсаулығына да ерекше мән береді. Халқымыз «Денсаулық – зор байлық» деп бекер айтпаған. Адам баласына берілген нығметтердің ішіндегі ең үлкендерінің бірі – денсаулық. Көп жағдайда адам бұл нығметтің қадірін ауырғанда немесе одан айырылғанда ғана түсінеді.

Пайғамбарымыз Мұхамед (оған Алланың салауаты мен игілігі болсын) былай деген: «Адамдардың көбі қадірін білмейтін екі нығмет бар: денсаулық пен бос уақыт». Бұл хадис бізге денсаулықтың қаншалықты маңызды екенін көрсетеді. Денсаулық – құлшылық жасауға, еңбек етуге, отбасыны асырауға және қоғамға пайда келтіруге мүмкіндік беретін үлкен нығмет. Алла Тағала Құран Кәрімде: «Өздеріңді өз қолдарыңмен қауіп-қатерге салмаңдар» деп бұйырады. Бұл аят мұсылман адамның өз денсаулығына жауапкершілікпен қарауы керектігін білдіреді. Денсаулыққа зиян келтіретін әрекеттерден сақтану – әрбір мұсылманның міндеті.

Ислам тазалыққа ерекше көңіл бөледі. Дәрет алу, ғұсыл құйыну, киім мен дененің тазалығын сақтау – мұсылман өмірінің ажырамас бөлігі. Пайғамбарымыз (оған Алланың салауаты мен игілігі болсын): «Тазалық – иманның жартысы» деген. Тазалық адамның денсаулығын сақтауға және түрлі аурулардың алдын алуға себеп болады.

Сондай-ақ дұрыс тамақтану да маңызды. Ислам ысырапшылдыққа жол бермейді. Алла Тағала: «Ішіңдер, жеңдер, бірақ ысырап етпеңдер» дейді. Артық жеу, зиянды тағамдарға әуестену немесе ағзаға зиян келтіретін нәрселерді пайдалану адамның денсаулығына кері әсер етеді. Денсаулықты сақтау үшін дене белсенділігі де қажет. Пайғамбарымыз (оған Алланың салауаты мен игілігі болсын) күшті мұсылманның әлсіз мұсылманнан артық әрі сүйіктірек екенін айтқан. Сондықтан адам денесін шынықтырып, сергек жүруге тырысуы керек. Бұл да Алланың аманатына деген жауапкершіліктің бір көрінісі.

Денсаулық – Алланың бізге берген аманаты. Аманатқа қиянат жасамауымыз керек. Уақтылы демалу, дұрыс тамақтану, тазалық сақтау, зиянды әдеттерден аулақ болу және рухани өмірімізді нығайту арқылы денсаулығымызды қорғай аламыз. Алла Тағала баршамызға мықты денсаулық, ұзақ ғұмыр, берекелі өмір нәсіп етсін! Ауру жандарға шипасын беріп, елімізге амандық пен тыныштық сыйласын!

Әмин!

 Саламат Аманбаев

«ҚҰДАЙБЕРГЕН» мешітінің имамы