"Домалақ ана" мешітінде өткен рухани кездесуде аудандық "Бәйдібек" мешітінің наиб имамы Азамат Балхожаев жамағатқа «Жүрек дерттері» тақырыбында мазмұнды насихат айтып, рухани тазалықтың адам өміріндегі маңызына кеңінен тоқталды.

Уағыз барысында ол жүректің адамның ішкі жан дүниесін қалыптастыратын негізгі рухани орталық екенін түсіндіріп, оның тазалығы мен саулығы көркем мінездің негізі болып саналатынын атап өтті. Сонымен қатар, наиб имам тәкаппарлық, қызғаныш, көреалмаушылық және екіжүзділік секілді жағымсыз қасиеттердің жүрекке әсер ететін рухани дерттер екенін айтып, олардың адам болмысына кері ықпалын жан-жақты түсіндірді. Ол мұндай келеңсіз қасиеттерден арылу үшін адам үнемі өзін тәрбиелеп, бойындағы кемшіліктерді түзетуге ұмтылуы қажет екенін жеткізді.

Кездесу барысында жүрек тазалығын сақтаудың маңызды жолдарының бірі ретінде шынайылық, сабырлылық және мейірімділік қасиеттерін дамыту қажеттігі айтылды.

Сондай-ақ, Азамат Балхожаев адамдар арасындағы татулық пен өзара сыйластықтың жүректегі ізгі ниеттен басталатынын атап өтіп, жамағатты адамгершілік құндылықтарды берік ұстануға шақырды.

Насихат кезінде кешірімділік пен қанағатшылдықтың адамды рухани кемелдікке жетелейтін асыл қасиеттер екендігіне ерекше назар аударылды.

Жамағатқа жүрек дерттерінен сақтану үшін пайдалы орта қалыптастырып, жақсы адамдармен қарым-қатынасты нығайтудың маңызы түсіндірілді.

Тағылымды кездесу соңында қатысушылар жүрек тазалығының қоғамдағы бірлік пен берекенің негізі екенін ұғынып, рухани тәрбиені күшейту жөнінде құнды мағлұмат алды.

Жамбыл аудандық орталық мешітінің баспасөз қызметі