Адам баласының рухани кемелдену жолындағы ең асыл қасиеттердің бірі – адалдық. Адалдық – жүректің тазалығы мен ниеттің шынайылығын айқындайтын өлшем.

Мұсылмандық тұлға осы қасиет арқылы өз болмысын қалыптастырады.

Иманның нұры адалдықпен толыққанда ғана жүрек тыныштық табады. Сондықтан адалдық – мұсылманның өмірлік ұстанымына айналуы тиіс.

Қасиетті Құран Кәрім адамзатты адалдық, шынайылық пен әділетке үндейді.

Онда: «Расында, Алла сендерге аманаттарды иелеріне қайтаруды бұйырады» делінеді.

Бұл аят адалдықтың тек сөз емес, үлкен жауапкершілік екенін көрсетеді. Аманатқа адал болу – мұсылмандық мінездің негізі.

Әрбір іс пен әрекет осы жауапкершілікпен өлшенеді.

Адалдық адамның ішкі әлемінен бастау алады.

Өз-өзіне шынайы бола білген жан ғана өзгеге адал бола алады.

Өтірік пен қулық жүрекке қараңғылық түсіреді.

Ал адалдық – сол қараңғылықты сейілтетін жарық.

Адам адал болған сайын оның сөзі де, ісі де салмақтана түседі.

Сенім – адалдықтың жемісі.

Сенімді жоғалтқан адам рухани әлсірейді.

Сондықтан мұсылман сенімді бәрінен жоғары қояды.

Пайғамбарымыз Мұхаммед (с.а.у.) адалдықты иманның бір бөлігі ретінде түсіндірген.

Ол: «Шыншылдық жақсылыққа бастайды, ал жақсылық жәннатқа жетелейді» және "Алдаған бізден емес!" деп бұйырған. Бұл хадистер адалдықтың адамды биік дәрежеге жеткізетінін білдіреді.

Мұсылман үшін әрбір сөз – аманат.

Сол аманатты бұзбау – үлкен жауапкершілік.

Адалдық тек үлкен істерде ғана емес, ұсақ-түйек әрекеттерде де көрінеді.

Кішкентай қиянаттың өзі жүректі қарайтады.

Ал кішкентай адалдық үлкен сенімге жол ашады.

Отбасы – адалдықтың алғашқы мектебі.

Бала ата-анасының ісінен үлгі алады.

Егер үйде адалдық үстем болса, ұрпақ та сол қасиетпен өседі.

Қоғамның беріктігі де осыған байланысты.

Адал азаматтар көбейген сайын әділет орнайды.

Әділет орнаған жерде тыныштық болады.

Тыныштық – елдің ең үлкен бақыты.

Адалдық – нәпсіні тәрбиелеудің де негізі.

Нәпсісін жеңген адам ғана шынайы еркіндікке жетеді.

Мұсылман осы жолда сабыр мен тақуалықты серік етеді.

Сабыр – адалдықты сақтауға көмектеседі.

Тақуалық – оны тереңдетеді.

Адалдық – уақытпен өлшенбейтін құндылық.

Ол адамның абыройын арттырады.

Сондықтан мұсылмандық тұлғаның тамыры адалдықпен нәр алғанда ғана берік әрі мәңгілік болмақ.  

Жайна Бекназарова

Жамбыл аудандық Бәйдібек мешітінің ұстазы