Мешіт – мұсылмандардың құлшылық жасап, рухани тыныштық табатын қасиетті орны. Сондықтан әрбір мұсылман мешітке кіргенде белгілі бір әдептерді сақтауы тиіс. Ең алдымен, мешітке барар алдында адам өз денесі мен киімінің таза болуына ерекше мән беруі қажет. Исламда тазалық – иманның жартысы деп айтылған. Жағымсыз иіспен, лас немесе ретсіз киіммен мешітке келу – өзгелерге қолайсыздық тудырып, әдепке қайшы әрекет болып саналады. Әсіресе сарымсақ, темекі сияқты өткір иістерден сақтану маңызды. Мешітке оң аяқпен кіріп, арнайы дұға оқу – Ислам әдебінің бір бөлігі. Ал мешіттен шығарда сол аяқпен шығу ұсынылады. Бұл – Мұхаммед пайғамбар (оған Алланың салауаты мен сәлемі болсын) көрсеткен сүннет амал.

Мешіт ішінде өзін ұстай білу – үлкен мәдениеттіліктің белгісі. Қатты сөйлеу, күлу, дауыс көтеру, бос әңгімеге берілу – мешіт әдебіне қайшы. Себебі мешіт – тек құлшылық орны ғана емес, жүректі тәрбиелейтін рухани мектеп. Сондықтан әр адам бұл жерде сабырлы, байсалды болуы керек. Қазіргі заманда ұялы телефонды өшіріп немесе дыбыссыз режимге қою – маңызды әдептің бірі. Намаз кезінде телефонның шырылдауы басқа жамағаттың зейінін бұзады. Бұл – кішкентай нәрсе болғанымен, үлкен жауапкершілікті талап етеді. Мешітке кірген адам бос орынға жайғасып, өзгелерді ығыстырмауы керек. Алдыңғы қатарларға ұмтылу – құптарлық іс, алайда ешкімге кедергі келтірмеу маңызды. Кешігіп келген адам жамағатқа зиян келтірмей, тыныш түрде өз орнын табуы тиіс. Намаз оқылып жатқан кезде мешіт ішінде тәртіп сақтау қажет. Намаз оқып тұрған адамның алдынан кесіп өтпеу – маңызды қағидалардың бірі. Бұл – намаздың құрметін сақтау болып табылады.

Мешітке кірген әрбір мұсылман екі рәкат «тәхиятул-мәсжид» намазын оқуы – сүннет амал. Бұл – мешітке деген құрметтің белгісі әрі сауапты іс. Сондай-ақ, мешіт – барша мұсылманға ортақ орын. Сондықтан оны таза ұстау, қоқыс тастамау, мүліктеріне зиян келтірмеу – әрбір келушінің міндеті. Балаларды мешітке алып келген жағдайда, олардың тәртібіне де көңіл бөлу қажет, өйткені олар да мешіт әдебін үйренуі тиіс. Мешітте Құран оқу, зікір айту, дұға жасау – ең абзал істердің бірі. Уақытты бос өткізбей, пайдалы амалдарға жұмсау – мұсылманның көркем мінезінің белгісі. Сондай-ақ, мешітке келгенде өзгелермен сәлемдесіп, жылы қарым-қатынас орнату – сауапты іс. Жамағаттың бірлігі мен татулығы да мешіт әдебінің бір бөлігі болып табылады

Қорытынды: Мешіт әдебін сақтау – әр мұсылманның имандылығы мен тәрбиесінің айғағы. Қасиетті орында өзін дұрыс ұстай білген адам қоғамда да сыйлы болады. Мешітке деген құрмет – дінге деген құрметтің көрінісі.

 Зейне Жұмабайұлы

Жамбыл облысы, Қордай ауданы,

Қордай ауылы «Нұрислам» мешіті имамы