Аудан бас имамы Дәуіт Сейітқалиұлы “Жақсымбет” мешітіне жиналған жамағатқа ұлттық құндылықтарды дәріптеу мақсатында «Дін мен дәстүр» тақырыбында насихат айтты.

Насихат барысында бас имам дін мен дәстүрдің бір-біріне қарсы емес, керісінше бірін-бірі толықтыратын құндылықтар екенін атап өтті. Қазақ халқы ежелден ислам дінін берік ұстанып, ұлттық салт-дәстүрін шариғат талаптарына сай қалыптастырғаны айтылды. Үлкенге құрмет, кішіге ізет көрсету, қонақжайлық, ата-ананы қадірлеу секілді көптеген дәстүрлердің барлығы исламның көркем мінез қағидаларымен үндесетіні түсіндірілді.

Сондай-ақ, бас имам жастарды ұлттық құндылықтарды құрметтеуге, дінді дұрыс түсінуге шақырды. Қазіргі таңда кейбір адамдардың дін мен дәстүрді бір-біріне қарсы қоюы дұрыс емес екені, мұндай түсініктің қоғамға кері әсер ететіні де айтылды. Сондықтан әрбір мұсылман ата-бабадан келе жатқан ізгі дәстүрлерді сақтай отырып, дінді дұрыс үйренуі қажет екені насихатталды.

Меркі аудандық “Меркі ата” мешітінің баспасөз қызметі