‎Жамбыл облысы, Сарысу ауданы, Жаңатас қаласындағы "Жаңатас" мешітінде соңғы айларда ауқымды құрылыс жұмыстары жүргізіліп келеді. Мешіттің жаңа келбеті мен заманауи мүмкіндіктерін қамтамасыз ету мақсатында басталған бұл жұмыстар жамағаттың ыңғайлылығы мен рухани өмірдің дамуына бағытталған.

‎Сарысу аудандық орталық мешітінің бас имамы Айбек Амангелдіұлы мешітке арнайы келіп, жүргізіліп жатқан құрылыс барысын зерделеді. Жобада мешіт ішіне жылы еден төсеу, имамға арнайы жеке кабинет дайындау және мешіт жанынан қызметтік үй салу көзделген. Бұл игі істердің барлығы — жамағатқа қолайлы орта қалыптастырып, қызметтің сапасын арттыру үшін жасалуда.

‎Жаңартылған мешіт — жамағаттың бас қосатын, жастардың имандылыққа бет бұратын, ауыл тұрғындарының рухани тірегі болатын орын. Құрылыс жұмыстары аяқталғанда, мешіттің сәулеті мен ішкі жабдықталуы қазіргі заман талаптарына сай, әрі шариғат әдебіне үйлесімді болады деп күтілуде.

‎Алла Тағала бұл істі берекелі етіп, сәтті аяқтауды нәсіп етсін! Жамағаттың бірлігі мен ынтымағы арқылы талай ізгі жобалар жүзеге асатынына сенеміз.