ҚМДБ Төрағасы, Бас мүфти Наурызбай қажы Тағанұлы Алматыда белгілі ақын, айтыс өнерінің жанашыры Жүрсін Ерманмен кездесті.

Кездесу барысында Бас мүфти Жүрсін Ерманның қазақ мәдениеті мен әдебиетіне сіңірген еңбегін жоғары бағалады. Сондай-ақ ақынға Діни басқарманың бастамалары мен атқарылып жатқан жұмыстарын таныстырды.

«Сіздің шығармаларыңыз ұлт руханиятының алтын қазынасына айналды. Өзіңіз секілді қалам ұстаған зиялы жандардың ақыл-кеңесі бүгінгі қоғамға ауадай қажет. Сіздерді әсіресе жастар үлгі тұтады, сондықтан сіздердей жандардың кеңесін алған жастар жаман болмайды» деді ҚМДБ Төрағасы.

Өз кезегінде Жүрсін Ерман қазақтың руханияты, ақындық өнердің жай-жапсары туралы айта келіп, өзін айтыстың болашағы және ұлттық құндылықтардың жойылып бара жатқаны алаңдататынын атап өтті.

Кездесу соңында Бас мүфти Наурызбай қажы Тағанұлы қаламгердің деніне саулық, отбасына амандық тілеп, иығына шапан жауып, сый-құрмет көрсетті.