Сенбі күні Бахрейн өз тарихындағы алғашқы ұлттық жерсерігі – Аль-Мунзир-ді орбитаға ұшырды. Arab News-тің хабарлауынша, бұл аппаратты елдің Ұлттық ғылыми-ғарыш агенттігі әзірлеген. Жерсеріктің жобалау және құрастыру жұмыстарына тек бахрейндік мамандар қатысқан.

Аль-Мунзир – жасанды интеллектті суреттерді өңдеу үшін қолданатын Таяу Шығыстағы алғашқы жерсерік.

«Аль-Мунзир жерсерігінің сәтті ұшырылуы – Бахрейн корольдігінің ғарыш кеңістігін игеру жолындағы маңызды қадамы. Ұлттық ғылыми-ғарыш агенттігінің ұжымына зор мақтаныш сезінемін. Бұл миссия орбиталық жүйелерді одан әрі сынаудың бастамасы болмақ», – деп мәлімдеді агенттік басшысы Мұхаммед Ибрагим Әл-Асири.

Жерсерікте Жер бетін бақылауға арналған камера мен киберқауіпсіздік жүйесі орнатылған. Аль-Мунзир Күнге қатысты тұрақты орбитамен 550 км биіктікте айналып, 2 жыл қызмет етеді.