"Құдайберген" мешітінде  Әжелер алқасы мектебі ашылды. Бастама мешіт ұстазы Малика Аханқызының ұйымдастыруымен болды. Әжелер төрайымы болып Жанаркул Дарменалиевна  тағайындалды. Әжелер алқасына бес апа жиналды. Әжелер алқасы  – тек әжелердің басын қосатын ұйым ғана емес, ол – халқымыздың рухани құндылықтарын ұлықтап, өнегелі ұрпақ тәрбиелеуге үлес қосатын үлкен тәрбие мектебі.

    Қазақтың «Жақсы әже – алтын қазына» деген сөзі бар. Әжелер – отбасының берекесі, ұрпақтың тәрбиешісі, салт-дәстүрдің сақтаушысы. Олар өнегелі сөздерімен, даналық толғаныстарымен, өмірлік тәжірибесімен жас ұрпақтың бойына ұлттық рухты, адамгершілік пен мейірімділікті сіңіреді.

   Бүгін ашылып отырған Әжелер алқасы – ұрпақ тәрбиесі мен ұлттық құндылықтарды насихаттауға бағытталған үлкен бастама. Бұл ұйым арқылы біз жас отбасыларға ақыл-кеңес беріп, балалардың бойына ізеттілік пен инабаттылықты дарытуға үлес қосамыз. Әжелер алқасы арқылы рухани мұрамызды сақтап, ана тіліміз бен салт-дәстүріміздің жаңғыруына ықпал етеміз.

   Осы орайда, Әжелер алқасының жұмысына сәттілік тілеймін! Біздің аналарымыз бен әжелеріміз әрдайым аман болып, еліміздің көркеюіне, ұрпақ тәрбиесіне үлесін қоса берсін!

Аудандық «Қордай» мешітінің баспасөз қызметі