Жамбыл ауданы Ақбұлым ауылы «Нұртай ата» мешітінде бесін намазына келген жамағатқа мешіт имамы Сабит Естеков «Алланың панасында болатан адам» турасында кеңінен уағыз айтты. Анығында, Құран Кәрімді жаттаған жан турасында насихат етті.

Құранды ашып, оны оқып, аяттардың мағынасына терең бойлаған сайын жаның тыныштық тауып, жүрегің ерекше сезімге кенеледі. Біздің бойымыздағы күйгелектік, сабырсыздық, ашушаңдық, тәкаппарлық, өзгемен көркем мәміле жасай алмайтын жағымсыз мінездің бәрі – ұлы Құраннан алыстап бара жатқанымыздың көрінісі.

Құран оқылған үйге Алланың берекесі мен тыныштығы орнайды. Құран оқылған үй ерекше нұрға бөленеді. Бұл туралы Алла елшісі (оған Алланың салауаты мен сәлемі болсын) былай деген екен: «Жер бетіндегілерге жұлдыздар қалай көрінсе, Құран оқылған үй де көктегілерге дәл солай көрінеді». Пайғамбарымыз (оған Алланың салауаты мен сәлемі болсын) тағы бір хадисінде: «Құранның әрбір (жатталған) аяты (жаттаған кісінің) жәннаттағы дәрежесін көтереді және үйлерінде (оқылған Құран) шамдар секілді (көктегілерге жарық шашады)» деп баяндайды.

Жамбыл аудандық мешітінің баспасөз қызметі