Меркі аудандық орталық «Меркі ата» мешітінде намазға жиналған жамағатқа мешіттің бас имамы Азамат Берікұлы «Отбасы құндылықтары» тақырыбында уағыз айтты.

Азамат Берікұлы: «Ислам дінінде отбасы бірлігіне айырықша маңыз берген. Отбасы - Исламда баға жетпес құндылықтар ретінде әспеттеледі. Қоғам отбасыдан басталатындығын ардақты Пайғамбарымыз (Оған Алланың игілігі мен сәлемі болсын) жете түсініп, тұтас қоғамды таза ұстаудың бірден-бір кепілі – отбасы тәрбиесі мен жанұя құндылықтарында екендігіне маңыз берген. Ардақты Пайғамбарымыз (Оған Алланың игілігі мен сәлемі болсын): «Ер кісі отбасының бақташысы, сондықтан ол қол астындағыларға жауапты, әйел өз үйі мен балаларының бақташысы, сол үшін жауапты» деп, отбасындағы адамдардың өзара рөліне тоқталған. Осыған қарап-ақ отбасы мүшелерінің өзара міндеттерін Исламда анық көрсеткен. Ислам дінінде осылайша отбасы мүшелерінің өзара сыйластығы реттелген. Отбасы бірлігі бекем болса болашағымыз да баянды, ұрпақ тәрбиесі де ұлағатқа толы болмақ», - деп сөзін аяқтады.

Уағыз соңында елімізге тыныштық, жерімізге амандық, отбасыларға тұрақтылық тілеп дұға жасалды.

Меркі аудандық «Меркі ата» мешітінің баспасөз қызметі