Орталық "Һибатулла Тарази" мешітінде  дінтанушы-психолог Назерке Жаналиеваның ұйымдастыруымен "Келіні жақсының - керегесі кең" атты іс-шара өтті. Қоғамдағы түйіткілді тақырыптардың түйінін тарқатқан жиынның шымылдығын ҚМДБ-ның Жамбыл облысы бойынша бас имамы Бейбіт Мырзагелдиев ашып берді. Бас қосуға ҚМДБ-ның Жамбыл облысы бойынша Әйел-қыздар секторының жетекшісі Нұргүл Әлиханқызы, "Әжелер алқасы", мешіт шәкіртері, жамағат, БАҚ өкілдері қатысты.  

Жамбыл облысы "Әжелер алқасы" мүшелерінің ұйымдастыруымен ғибратқа толы көрініс көрсетілсе, "Һибатулла Тарази" мешітінің шәкірттері тақырыпқа сай өлең шумақтарын оқыды. Ал дінтанушы-психолог Назерке Жаналиева тақырыптың мазмұнын ашты.

Айналамыздан көріп-естіп жүргеніміздей, екінің бірінің басында «адуынды ене» не бол­маса «кесірлі келін» жайлы күр­меуі шешілмей жүрген түйт­кілдер бар. Негізінде, көшіміздің түзеліп, ұлт болып ұйысуымызда ұрпақ тəрбиесінің маңызы зор. Осы орайда негізгі рөл атқаратын ене мен келіннің өзара қарым-қаты­насының дұрыс болғаны жөн-ақ. Өйт­кені отбасының берекесін кіргізу де, тулақтай тоз-тозын шы­ғару да олардың өз қолдарында. Егер ене мен келін­нің керісі өз шешімін таппаса, шаңырағының берекесін қашырып, нәтижесінде отба­сын­дағы жас өскіндердің психологиясына, сонымен қатар тәр­биесіне кері әсерін тигізбей қоймайды. Бұл өз кезегінде, жел­кілдеп өсіп келе жатқан ұр­пақтың еңсесін түсіріп, олар­­дың жасық, жалтақ болып қа­лып­тасуына, бұрыс жолға бұрылып кетуіне итермелейді. Бұл ұлттық тәрбиеге жасалған қысастық, ауыр соққы екені айт­паса да түсінікті.

Осынған байланысты отбасы берекесі, ене мен келіннің қарым-қатынасын реттеу мақсатында өткен шарада 1 ене, 1 келін кейіпкер болды. Сонымен қатар, кеш барысында бір отбасы өз өмір жолын, қарым-қатынастарын, отбасы құрылу тәртібі мен заңдылығын айтып берді.

Әсерге толы, әрі ішкі-сыртқы мәселенің шешілуіне сабақ, ғибрат боларлық шара үшін әйелдер, қыз-келіншектер ұйымдастырушыларға алғысын айтты. 

Ақерке БЕКҚҰЛОВА

"Һибатулла Тарази" мешітінің баспасөз қызметі