Меркі ауданындағы «Әйелдерге арналған діни сауат ашу курсының» жетекшісі Тілеубердиева Маринаның ұйытқы болуымен ақ жаулықты әжелер мен шәкірттердің басын қосқан игілікті шара өтіп, «Әйел-қыздар» секторының қызметі қайтадан жанданды. Аталмыш жиынға ҚМДБ «Әйел-қыздар» секторының Жамбыл облысы бойынша жауапты өкілі, Жамбыл облыстық орталық «Һибатулла Тарази» мешітінің ұстазы Гүлжан Серікқызы және басқа да әйел ұстаздар арнайы шақырылып, төрден орын алды.

Сөз алған ҚМДБ «Әйел-қыздар» секторының Жамбыл облысындағы жауапты өкілі Гүлжан Серікқызы шәкірттерге ең ізгі лебізін арнады. Мешіттердің әйел жамағатын ауызбіршілікке шақырып, әсіресе, өмір тәжірибесі мол қазыналы қарияларымызды түрлі тақырыптық іс-шараларға белсенді түрде атсалысып, жастарға үлгі-өнеге көрсетуге үндеді.

Сонымен, «Әйел-қыздар» секторының бұл жиынында жаңа жоба-жоспарлар ортаға салынып, атқарылатын іс-шаралар белгіленді. Алдағы уақытта діни дәрістер жүргізумен бірге, қайырымдылық және спорттық іс-шараларын ұйымдастыру көзделуде. Ең бастысы, ұмытылып бара жатқан төл салт-дәстүрлерімізді жаңғыртып, ару-аналарымыздың ұлттық руханият қайнарынан сусындауына айрықша мән берілмек.

Айталық, заман талабына сай ұлттық киімдерімізді тек мерекелерде ғана киюмен шектелмей, күнделікті өмір салтына айналдыру хақында тың ой қозғалды. Мазмұн-мағыналы өткен жиын соңында үлкендер ұстаздарға алғысын айтып, баталарын берді. Меркі ауданы әйел жамағатының ізгі ниеті мен игілікті істеріне сәттілік тілейміз!

Меркі ауданы «Меркі ата» мешітінің баспасөз қызметі