Бүгін Жамбыл облысының бас имамы Бейбіт қажы Мырзагелдиев Байзақ ауданына арнайы ат артып барып қайтты. Халықты қуанышқа бөлеген Базарбай ауылында соғылған "Базарбай" мешітінің ашылу салтанатына қатысты.

Күндердің сұлтаны жұма күні жаңа бой көтерген күмбезді мешіт халыққа есігін айқара ашты. Аталған Алла үйінің лентасын қию рәсімінде облыстың бас имамы мешіт салудың артықшылығы жайында насихат айтып, құлшылық үйін соғуға атсалысқан азаматтарға алғысын білдірді. 

Ғимаратқа шашу шашылып, тұрғындар жиналса да карантинге қатысты қауіпсіздік шараларына аса мән берілді. Мешітке кіріп, сәлем намазы оқылған соң Құран бағышталып, ақсақалдар бата берді. 

 Сонымен қатар қайырымдылық іс-шарасы жасалып, Бейбіт Әліпбекұлы мен ауданның бас имамы Рамиз Азизов 10  отбасыға ақшалай жәрдемді табыстады.  

Ақерке БЕКҚҰЛОВА

"Һибатулла Тарази" мешітінің баспасөз қызметі