Тараз қаласына қарасты «Ар-Рахман Ар-Рахим» мешітінің имамы Ембергенов Амангелді Назарбайұлының ұйымдастыруымен мешіт ауласында Наурыз мерекесі тойланды. Наурыз думанына мешіт маңайында тұратын тұрғындар мен мешіт шәкірттері қатысты. Айтулы жиын Құран Кәрім аяттарын оқып, өмірден озған ата-бабаларға бағыштаумен басталды.
Қариялар бата беріп, насихат айтып өз қуаныштарымен бөлісті. Басқосуда мешіт имамы Ембергенов Амангелді Наурыз мерекесін тойлаудың шариғаттағы үкімі, Наурыздың мән-мағынасы, тарихы сынды тақырыптарда сөз қозғап, жамағатты Наурыз мерекесімен шын жүректен құттықтады. Сондай-ақ, жамағат ұлттық тағамдардан дәм татып, бір-бірлеріне ақ тілектерін айтып жатты. Ар-Рахман Ар-Рахим мешітінің әйел-қыздар секторы ұстазы Зора Айдарованың басшылық етуімен әйел-қыздар келген жамағатқа арнап дастархан жайып аянбай қызмет етті.
Әйел-қыздар жоғары деңгейде белсенділік таныта білді. Әйел-қыздар мұнымен шектеліп қалмай, өз өнерлерін ортаға салды. Атап айтқанда бүлдіршіндер өлең шумақтарын айтып, ән салып, жиынның көркін кіргізе түсті. 200 кісіге арнап ұйымдастырылған іс-шараға өзбек ұлты мен дүнген ұлтының өкілдері көп қатысатын болғандықтан бесік салар, тұсау кесер сынды қазақ дәстүрі көрсетіліп, салт-дәстүріміз кеңінен насихатталды. Әйел-қыздарға арнап мешіт тарапынан сыйлықтар таратылды.
Ар-Рахман Ар-Рахим мешітінің баспасөз қызметі