Түркияның Адам құқығы мен еркіндігін қорғау және гуманитарлық көмек қоры Индонезиядағы Сулавеси аралы ұшыраған дүлей апаттың салдарынан зардап шеккен 7 мыңдай адамға көмек көрсетті. Түрік ұйымдарының қызметкерлері жер сілкінісі мен цунами болған күннің ертеңінде-ақ Индонезияға жол тартқан болатын. Белсенділер 3 күнде Дунгала, Палу және Макассар регенттіктеріне жетіп, гуманитарлық көмек таратуды қолға алған.

Меценаттардың арқасында тұз, күріш, дәмдеуіштер, соя тұздығы, өсімдік майы, жұмыртқа, қант, печенье салынған қапшықтар 7 мыңнан астам индонезиялықтарға таратылған. Азық-түліктен басқа тұрмысқа қажетті және гигиеналық жиынтықтар да берілген. Түріктер күнделікті апаттан зардап шеккен жандар уақытша орналасқан орындарды шамамен 400 литрдей ауыз сумен қамтамасыз етуде. Сондай-ақ, аталмыш қордың белсенділері ұшқышсыз дрондардың көмегімен жергілікті билікке із-түссіз кеткен отандастарын іздестіруге атсалысуда. Жуырда ұйым апат болған аймаққа тағы да бір команда жіберуге дайындық үстінде. Гуманитарлық кампания іздеу-құтқару жұмыстары аяқталғанша жалғасатын болады.

Естеріңізге сала кетсек, қыркүйектің 28-ші жұлдызында Индонезияда қатарынан орын алған алапат жер сілкіну салдарынан Палу қаласын цунами басып өткен. Нәтижесінде бірнеше мыңдаған индонезиялықтар өз баспаналарын тастап, уақытша шатырларды паналауға мәжбүр болған.

asyldin.kz