Бүгін Тараз қалалық мәдениет үйінде «Рухани жаңғару: Зайырлы қоғамдағы ұлттық құндылықтардың орны»  тақырыбында облыстық конференция өтті.

Кездесуге «Жаңа-Ру» жастар коалициясы,  облыс өкіл имамы Данияр Жұмабаев,  Жамбыл облысы әкімдігі дін істері басқармасының бөлім басшысы Еркебұлан Есмаханов, Олжабаев Асхат және мұғалімдер мен студент жастарқатысты.  

Бас қосуда сөз сөйлеген «Һибатулла Тарази» мешітінің Бас имамы Данияр Әлимұхамедұлы: «Кез келген ұлт өз болашағының мықты болуын қаласа ұлттық тәрбиесіне, дініне, ділі мен тіліне мықты болуы керек. Қазақта «Балаңды өз тәрбиеңмен тәрбиелеме, өз ұлтыңның тәрбиесімен тәрбиеле» деген сөз бар. Әрбір халықтың тарихи өмірінде қол жеткізген ең құнды дүниелері – рухани және адами қасиеттері, моральдық нормалары, ұлттық құндылықтары бар. Ұлттық құндылықтар – қандай да бір этникалық қауым өкілдерінің өзіндік тарихи көрінісі бар рухани мұраттарының жиынтығы. Ұлттық құндылықтардың әрбір халықтың өмірінде алатын орны өзгеше екені белгілі. Сондықтан да әрбір жаңа ұрпақ үшін мәнді тәрбие – ұлттық тұрғыдағы тәрбие үлгісі болып табылады. Өйткені, мұнда тәрбиенің негізі ғасырлар бойы қалыптасып келген асыл рухани құндылықтар және биік ізеттілік пен моралдық тұрғысындағы ұрпақтан-ұрпаққа жалғасып жататын, адамның адамдық қасиетін нығайтып әрі асылдандыра түсетін, халықтың даналық өмір–салтынан туындап отыратын бұлжымас ережелер мен қағидалар құрайды. Қазақы дүниетаным, ақыл-ой, тағылымдық ұлағат ғасырлар бойы шыңдалып қалыптасты. Сол сан ғасырлық ұлттық тәрбиенің негіздерін бір арнаға түсіріп тәрбие мәселесінде пайдалану бүгінгі таңда күн тәртібінде тұрған ең басты қажеттілік деп білемін», - деген ойын жеткізді.

«Һибатулла Тарази» мешітінің Баспасөз қызметі