Мешіттің ұлылығы мен маңыздылығы – жер бетінде алғаш тұрғызылған құлшылық үйінің мешіт болуымен айқындалады. Қасиетті Құранда: «Негізінен адам баласы үшін Меккеде алғаш құрылған үй (Қағба) – бүкіл әлемге мүбәрак әрі тура жол», – деп баяндалған.

Бұл аяттағы Қағба – адамзат баласы үшін ең алғашқы әрі қасиетті құлшылық орны. Сондықтан мешіт – аса құрметті мекен, «Алланың үйі» деп аталады. Жамбыл облысы, Қордай ауданының бас имамы Азамат Берікұлы аудандық «Қордай» мешітінің көлік тұрақтарын ретке келтіру жұмыстарын ұйымдастырды. Бұл шара жамағаттың құлшылыққа кедергісіз келіп-кетуіне қолайлы жағдай жасау мақсатында қолға алынды.

Мешіт әдебін сақтау – тек ғимарат ішіндегі тәртіппен шектелмей, оның айналасындағы тазалық пен реттілікке де тікелей байланысты. Ұйымдастырылған жұмыс – ортақ жауапкершіліктің көрінісі. Баршамыздың ниетіміз бен амалымыз дұрыс болсын!

Аудандық «Қордай» мешіті баспасөз қызметі