Жамбыл облысы Байзақ ауданы Бурыл ауылы «Шолпан Дәуіт» мешітінде жазғы лагерде демалыстарын өткізіп жатқан оқушылар мешіттің тыныс-тіршілігімен танысып, ауыл имамы Қанат Тұмарбекұлымен сұқбаттасты.

Қанат Тұмарбекұлы: «Адамның бәрі ғалым болуы мүмкін емес. Дегенмен, Құран сөзімен айтқанда, білмеген мәселеде: «Егер білмесеңдер, білетіндерден сұраңдар», – деген аятты басшылыққа алуымыз керек («Әнбия» сүресі, 7-аят). Аллаға құлшылық ету, қоршаған ортамен үйлесіп, шариғат бойынша өмір сүру үшін мұсылманға діни әрі зайырлы білімді қатар алып жүру – заман талабы. Жейтін асымыз халал болуы үшін мал және диқаншылықпен айналысу қажет. Өндіріліп жатқан өнімге харам қоспа қосылып кетпеуі үшін технолог, биолог және химик маман болу, науқасты емдеу үшін білікті дәрігер болу керек. Ол үшін мұсылманға оқу керек», - деп «Білім алудың манызы» тақырыбында насихат айтты.

Мешітке келген балаларға тәттілер таратылып сый жасалды.