Бүгін Қазақстан мұсылмандары діни басқармасына қарасты «Байзақ баба» мешітінің бас имамы Қанат Әділханұлының бастамасымен күллі жамағат асыға күтетін шарапаты мол мәуліт мейрамына орай Қызыл жұлдыз ауылдық «Бейшен» мешітінде  дастархан жайылды. Дастарханды мешіт имамы Оразов Акбар мен жамағаты ұйымдастырды. Шам намазына жиналған  жамағат жүзінен әлемдерге рахым етіліп қана жіберілген хақ Елшіге (оған Алланың салауаты мен сәлемі болсын) деген сағынышты табын жазбай танисыз.

Қасиетті Құран аяттарының нұрымен бастау алған игі шара, қалың жұртшылықтың Алла елшісіне (оған Алланың салауаты мен сәлемі болсын) салауат айтуымен жалғасын тапты. Мәліт жырын Тараз қаласындағы «Усманжан баба» мешітінің имамы Баймаханов Ораз Орта Азияға кең тараған, Барзанжи жазған Мәуліт жырын арапша оқып, «Байзақ баба» мешітінің наиб имамы Бақытбек Сағымбаев қазақшасын жырлады.

Осы айда еліміздің әр түкпірінде пайғамбарымыз Мұхамедтің (оған Алланың салауаты мен сәлемі болсын) туған күні, яғни мәуліт мерекесі аталып өтілуде. Бұл мереке адамзаттың асыл тәжі болған Хақ Елшісіне (с.а.у) деген ерекше сүйіспеншіліктен туындағаны хақ.