Жамбыл облысы Байзақ аудандық «Байзақ баба» мешітінің бас имамы Қанат Әділханұлы  «Жамбыл облысы әкімдігінің дене шынықтыру және спорт басқармасының Байзақ ауданындағы 8 облыстық мамандандырылған балалар-жасөспірімдер спорт мектебі» коммуналдық мемлекеттік мекемесінің жас спортшыларымен жүздесті.

Жүздесуге аталған спорт мектебінің басшысы Аслан Асықбекұлы және спорт мектебінің ұжымы, жас спортшылар мен бапкерлер қатысты.

Қанат Әділханұлы: «Ислам діні өз қоғамын қуатты да айбынды болуы үшін, спортқа ерекше көңіл аударып, онымен айналысуға шақырады. Қасиетті Құранның 42 жерінде «қуат» сөзі кездеседі. Әбу Һурайра жеткізген хадис-шәріпте хазреті пайғамбарымыз Мұхаммед (Оған Алланың игілігі мен сәлемі болсын) осы мәселеге байланысты: «Екеуінде де өз қайыры болса да, қуатты мүмін Аллаға, әлсіз мүміннен жақынырақ және сүйіктірек», – деген (Имам Мүслім).

Басқа бір хадисте пайғамбарымыз (Оған Алланың игілігі мен сәлемі болсын): «Расында, сенің Раббыңның сенде ақысы бар, сенің денеңнің сенде ақысы бар, сенің отбасыңның сенде ақысы бар және сенің қонағыңның сенде ақысы бар, сол үшін сен ақысы барлардың ақысын бер», – дейді (Имам Әл-Бұхари, имам Мүслім). Демек, спорт – ағзаларымыздың ақысы. Ол денемізді шынықтыру арқылы өтелмек», - деді. 

Байзақ аудандық мешітінің баспасөз қызметі