Жамбыл гуманитарлық-техникалық университеті күндізгі педагогика факультетінің «Әлем тілдері» кафедрасының білімгерлері мен қалалық «Әулие-ата» мешітінің бас имамы Ахметжан қажы Керімбектің кездесуі болып өтті.
Кездесу барысында имам жастарға асыл дініміз – Исламның және оның ішінде дәстүрлі ұстанымымыз Әбу Ханифа мазһабының құндылықтары мен артықшылықтары туралы кеңінен түсіндірді. Сондай-ақ, Ислам дінін қалай дұрыс түсіну керектігі мен иман негіздері және жас кезден алған тәлім-тәрбиенің мән-маңызы жайлы уағыз айтты.

Жиынға қатысқан жастардың орамал тағу, әурет жерлерді жабу, отбасы бірлігі, ата-анаға құрмет және бала тәрбиесі, көркем мінез-құлық, өзара қарым-қатынас т.б. дін тұрғысындағы көптеген сұрақтарына жауап берді.
Сонымен қатар, кездесуде қазіргі таңда қоғамда жиі орын алып жатқан ерте үйленіп, ажырасулардың жиілеп кеткендігі, дініміздегі некенің тәртібі мен маңыздылығы, ажырасудың себеп-салдары мен алдын-алу жолдары, т.б. да маңызды мәселелер сөз болды.