Мойынқұм ауылындағы Жамбыл атындағы мектеп-гимназиясының жоғары сынып оқушыларымен кездесу өтті. Кездесуге мешіт жамағаты, ауыл қариясы Зияділда Әлімбетов, «Һибатулла Тарази» медресесінің шәкірті Рүстем Қалмұратов, Жамбыл мектеп-гимназия директорының тәрбие ісі жөніндегі орынбасары Сәкен Исмаилов, мектеп психологы Рима Сатыбалдиева және жүздеген оқушылар қатысты. Алғаш сөз алған аудан имамы Қуат Дүйсенбайұлы оқушыларға Ұлық болған Құрбан айт мерекесінің қадірін, адамға берер пайдасын, құрбанға шалынатын малдың қандай болатынын түсіндіріп берді. Оған қоса қазіргі таңда елімізде қаптап кеткен діни ағымдар турасында мағлұмат берді. Аудан имамынан кейін сөз алған мешіт қариясы Әлімбетов З. Оқушыларға өзінің көрген өнегелі өмірін айтып ақ жолдан айнымай, имандылықтан айырылмай иманды ұл, ибалы қыз болып өсулерін айтып өтті.