Оңтүстік Қазақстан облысы Сарыағаш қаласында қыздар медресесі ашылды. Оқу ордасының ашылу салтанатына Қазақстан мұсылмандары діни басқармасының төрағасы Ержан қажы Малғажыұлы қатысты.

Шәкірттермен кездесуде Бас мүфти өскелең ұрпақты имандылыққа, Отансүйгіштікке тәрбиелеудің маңызы жайлы сөз қозғады. Өйткені, ел болашағы саналған жастардың тәрбиесі қашанда қаперде болуы тиіс.

«Біздің бабаларымыз ұлды ұлықты, қызды қылықты етіп тәрбиелеуге көңіл бөлген. Біз әке тұрып бала сөйлемеуге дағдыланған халықпыз. Бүгінгі ашылған қыздар медресесі қаракөз қарындастарымызға тек Ислам ілімдерін үйретіп қана қоймай, елін сүйетін, ұлттық құндылықтарды бойына сіңірген ұрпақ сабақтастығын қалыптастыруға қызмет етеді деген сенімдемін», - деді Бас мүфти Ержан қажы Малғажыұлы.

Қыздар медресесі - ТМД елдерінде баламасы жоқ еуропалық стандартпен салынған тұңғыш ғимарат. Бір мезетте 180 қыз балаға қызмет ете алады. Жаттығу залы, 6 оқу сыныбы, асханасы, тігін үйрету шеберханасы да бар. Ғимарат аумағы - 3 мың шаршы метр.

Шара барысында Сарыағаш медресесінің тұңғыш 43 түлегі Бас мүфти қолынан диплом алды.

www.muftyat.kz

www.muftyat.kz