Көктемгі әскер қатарына жастарды шақыру басталды. Осыған орай Жуалы аудандық қорғаныс істері жөніндегі бөлімде әскерге шақырылушылармен және ата-аналарымен кездесу өткізілді.  Әскерге шақырылушы жастар сапқа тұрғызылды. Қазақстан Республикасының Әнұраны орындалды. Салтанатты жиынды аудандық қорғаныс істері жөніндегі бөлімнің бастығы Ғалымжан  Садыбеков ашып, Қазақстан Қарулы Күштері қатарына алынатын  аудан жастарына азаматтық борыштарын абыроймен атқарып, отбасыларына аман-есен оралуларына тілектестігін жеткізді.

Ауданның бас имамы Алмас Кенжемолдаев бата беріп, жақсы сарбаз, жақсы жігіт болып қайтыңдар деген тілегін айтты. Ал ата-аналар арасынан Б.Момышұлы ауылының тұрғыны Сексенбай Әбдраймов сөйлеп, жастарды жігерлі болуға үндеді.

Әскерге  шақырылушы жастар арасынан Б.Момышұлы ауылының тұрғыны Мұрат Сейсенбайға сөз берілді: «Біз Отан алдындағы борышымызды абыроймен өтейміз.  Ауданымыздан шыққан Батырларымыз Бауыржан мен Бақытжан аталарымыздай ел мерейін үстем етер жауынгер боламыз. Ата-анамыздың, барлықтарыңыздың сенімдеріңізді ақтаймыз деп уәде береміз»,- деді ол. Жиын барысында аудандық мәдениет үйінің әншілері патриоттық әндер орындады.

 
Салтанатты жиынды аудандық қорғаныс істері жөніндегі бөлімнің бастығы Ғалымжан Садыбеков қорытындылады.

Д.Маратұлы.