Жасөспірімдердің жаздық демалысын көңілді өткізу үшін сауат ашу курстары ұйымдастырылып, жастарды рухани тәрбие алуына жағдай жасау болатын. Жас ұрпақтың дені сау болып өсуі - Отанымыздың нұрлы болашағының кепілі болғандықтан, осындай ізгі бастаманың халық арасында қанат жаюының алғы шарты еді. Бұл өз кезегінде халықтың өкілі болған имамдарға жүктелетіні даусыз. ҚМДБ-ның Жамбыл облысындағы өкілі, «Һибатулла Тарази» мешітінің бас имамы Жұмабаев Данияр қажының ұйымдастыруымен, Тараз қаласындағы мешіттердің сауат ашу курсындағы жасөспірімдер арасында жарыс болып өтті.

Жарыс түрлерінен: қашықтыққа жүгіру, футбол, кермеге тартылу, арқан тарту, қолкүрес және өзге де спорттық ойындар болды. Футболдан бас жүлде алған командаға бас имамның кубогі беріліп, басқа да жүлделі топ пен жеке жүлделі жеңімпаздарға грамоталар тапсырылды. Бұл шараға жастарды даярлап, жарысқа жақыннан жәрдемдесіп, атсалысқан мешіттер қатарында: «Һибатулла Тарази» «Әулие-Ата», «Шәкіржан ата», «Асым-Ата», «Рахман - Рахим», «Молда Мухамеджан», «Намаз ата» мешіттері болды.

Бас имам құттықтау сөзінде «Біз жастарды, діни сауаттылықпен қатар, дене шынықтырып, салауатты өмір салтын ұстануға да көмектесеміз. Халқымызда «Дені саудың - жаны сау»,- деген аталы сөз бар. Бұл жарыстың мақсаты - жастарды жалынды, өр рухты, қайсар әрі жігерлі болуға тәрбиелеу. Ел ертеңі - жастардың денсаулығы ақаусыз болса, Отанымыз мәңгі көркейе бермек. Ислам діні де адамзат баласының бақыты үшін жіберілгендігін естен шығармайық. Адам баласының жүрегі таза, дені сау болмайынша, тазалықққа кепілдік жасай алмайды. Иман - тазалықтың кепілі. Біз жастарды жан-жақтылы тәрбиелеуіміз керек. Бүгінгі озық дамыған заманның талабына сай ұрпақ тәрбиелеу - қоғам мен ата-аналардың басты борышы»,- деп қайыра келе, осы ізгі бастама, Алла жазса, әр жыл сайын жалғасын табатынын жеткізді.

«Һибатулла - Тарази» мешіті баспасөз қызметі