Меркі аудандық «Меркі ата» мешітінде қасиетті Құрбан айт мерекесіне орай айт намазы оқылып, жамағатқа мерекелік көңіл-күй сыйланды. Намаздан кейін ұлттық құндылықтарымызды дәріптеу мақсатында қазақтың дәстүрлі спорт ойындарынан жарыстар ұйымдастырылды.

Атап айтқанда, жамағат арасында арқан тарту, гір тасын көтеру және садақ ату сынды ұлттық ойындар бойынша сайыстар өтті. Жарысқа ауыл жастары мен мешіт жамағаты белсенді қатысып, өзара бақ сынасты. Қатысушыларға көтеріңкі көңіл-күй сыйлаған шара ауызбіршілік пен татулықты нығайтуға бағытталды.

Ұлттық ойындар – ата-бабамыздан қалған асыл мұра. Осындай игі шаралар арқылы жастарды салт-дәстүрді құрметтеуге, салауатты өмір салтын ұстануға тәрбиелеудің маңызы зор.

Шара соңында жеңімпаздар қаржылай марапатталып, Құрбан айт мерекесінің қадір-қасиеті насихатталды.

Меркі аудандық «Меркі ата» мешітінің баспасөз қызметі