Жаһандану дәуірінде ақпарат ағынының толассыздығы адамзат баласына зор мүмкіндіктермен қатар, үлкен қауіп-қатерлерді де ала келді. Бүгінде қоғамның дертіне айналған өзекті мәселенің бірі – жат діни ағымдардың жетегінде кету.

«Жат ағым жарға жығады» деген сөз тегін айтылмаған. Себебі, дін атын жамылған теріс идеологиялар адамның тек сенімін ғана емес, сонымен бірге оның тағдырын, отбасын және мемлекеттің тұтастығын талқандауға қауқарлы.

Жат ағымдардың негізгі мақсаты – адамның санасын улап, оны өз Отанына, салтына, тіпті туған ата-анасына қарсы қою. Олар көбінесе діни сауаты төмен, өмірден өз орнын таппай жүрген жастарды нысанаға алады.

Қасиетті Құран Кәрімде Жаратушы Иеміз адамдарды бірлікке шақырып, бүлік шығарудан сақтандырады:

«Алланың жібіне (дініне) жаппай жабысыңдар да, бөлінбеңдер...» («Әли Имран» сүресі, 103-аят).

Бұл аят мұсылман үмбетінің тұтастығын сақтауды бұйырады. Алайда, жат ағымдар қоғамды «біздікілер» және «кәпірлер» деп екіге бөліп, іріткі салу арқылы исламның нағыз бейбіт бейнесіне нұқсан келтіреді.

Жат ағымдардың басты белгілері мен қауіптері:

Ұлттық құндылықтарды жоққа шығару: Олар қазақ халқының ғасырлар бойы қалыптасқан салт-дәстүрін, домбырасын, келін сәлемін «ширк» (Аллаға серік қосу) деп айыптайды.

Соқыр сенім: Тек өздерінің «ұстаздарын» ғана дұрыс санап, өзге діни мектептер мен мазхабтарды мойындамайды.

Радикализм мен экстремизм: Ниеті бұзылған топтардың соңы көбінесе қантөгіске, лаңкестікке және Отанды сатуға алып барады.

Алла Тағала Құранда тағы бір аятта былай ескертеді:

Дінде зорлық жоқ. Расында, туралық азғындықтан ажыратылды...» («Бақара» сүресі, 256-аят).

Бұл аят діни ұстанымның жүрек қалауымен және біліммен болуы керектігін, ешқандай қысым мен агрессияға жол берілмейтінін нақтылайды. 

Қорытындылай келе, «Адасқанның айыбы жоқ, қайтып үйірін тапқан соң» демекші, қателескен жандарды дұрыс жолға салу – бәрімізге ортақ міндет. Алайда, жарға жығылмас үшін ең алдымен діни сауаттылықты арттырып, дәстүрлі Ислам құндылықтарына сүйенуіміз қажет.

Рухани қауіпсіздік – ұлттық қауіпсіздіктің ажырамас бөлігі. Ата-бабамыз ұстанған Әбу Ханифа мазхабы біздің табиғатымыз бен мәдениетімізге ең жақын, бейбітшіл жол. Жат ағымның арбауына түспеу үшін әрбір азамат «не ішіп, не жегеніне» ғана емес, «не оқып, кімді тыңдағанына» да мұқият болуы тиіс. Бірлігіміз бекем, иманымыз кәміл болғанда ғана ешқандай жат пиғыл біздің іргемізді сөге алмайды.

Ержан Көшкімбай

Мойынқұм ауданының бас имамы