Зекет – Исламның бес парызының бірі. Ол – дәулетті мұсылманның белгілі мөлшердегі мал-мүлкінен жылына бір рет мұқтаж жандарға беретін міндетті садақасы. Зекет тек әлеуметтік көмек қана емес, рухани тазару мен қоғамдағы әділеттілікті орнықтыратын ұлы ғибадат.

      Құрандағы зекеттің орны

Қасиетті Құран Кәрім-де намазбен қатар зекет жиі бірге айтылады. Бұл – оның Исламдағы маңызының айғағы. Алла Тағала:  «Намазды толық орындаңдар және зекет беріңдер» деп әмір етеді (Бақара сүресі, 43-аят).

Зекет сөзі араб тілінде «тазару», «өсу», «береке» деген мағыналарды білдіреді. Яғни зекет беру – малды кеміту емес, керісінше берекесін арттыру.

     Пайғамбар хадисіндегі зекет

Мұхаммед пайғамбар (с.ғ.с.) зекетті Исламның тіректерінің бірі ретінде атап өткен. Хадисте: «Ислам бес нәрсенің үстіне құрылған: Алладан басқа тәңір жоқ екеніне және Мұхаммед Оның елшісі екеніне куәлік ету, намаз оқу, зекет беру, ораза ұстау және қажылыққа бару» – делінген.

Бұл хадис зекеттің парыз екендігін нақты білдіреді.

   Зекет кімге беріледі?

Құранда зекет берілетін сегіз топ көрсетілген (Тәубе сүресі, 60-аят). Олар:

1. Кедейлер

2. Міскіндер

3. Зекет жинаушылар

4. Жүректері Исламға жақындатылатындар

5. Құлдарды азат ету

6. Қарызға батқандар

7. Алла жолындағылар

8. Жолаушылар

Бұл жүйе қоғамдағы әлеуметтік тепе-теңдікті сақтауға бағытталған.

Зекеттің рухани және әлеуметтік пайдасы

Рухани пайдасы:

Сараңдықтан арылтады

Шүкіршілікті арттырады

Жүректі жұмсартады

Әлеуметтік пайдасы:

Бай мен кедей арасындағы алшақтықты азайтады

Қоғамда бауырмалдықты күшейтеді

Кедейліктің алдын алуға ықпал етеді

Зекет – қоғамдағы ынтымақ пен әділдіктің кепілі

Зекет – жай қайырымдылық емес, Алланың әмірі. Ол адамның малын тазартып қана қоймай, жүрегін де тазартады. Берілген зекет қоғамға пайда әкеліп, мұқтаж жанның алғысын алуға себеп болады.

Әрбір дәулетті мұсылман зекетті есептеп, уақытында беруге жауапты. Өйткені зекет – аманат әрі парыз.

Алла Тағала берген несібемізге береке беріп, зекетімізді қабыл етсін!

Ержан Аманбаев

Тараз қалалық орталық Әулие ата мешітінің бас имамы