Ислам діні адам өміріндегі ең маңызды құндылықтардың бірі – отбасы екенін айқын көрсетеді. Отбасы – иманның, тәрбиенің, мейірім мен жауапкершіліктің ордасы. Ал дәстүр – сол отбасының рухани тамыры, ұлттың болмысын сақтайтын құндылықтар жиынтығы. Дін мен дәстүр үндескен жерде береке мен бірлік орнайды.

     Исламдағы отбасының орны

Қасиетті Құран Кәрім-де отбасы мәселесіне ерекше мән берілген. Алла Тағала ер мен әйелдің некесін Өзінің белгілерінің бірі ретінде баяндайды:

«Сендерге өздеріңнен жұбайлар жаратып, араларыңа сүйіспеншілік пен мейірім салғаны – Оның белгілерінен» (Рум сүресі, 21-аят)

Бұл аят отбасының негізі – махаббат пен рақым екенін көрсетеді. Исламда неке – жай ғана келісім емес, қасиетті аманат.

Пайғамбарымыз Мұхаммед пайғамбар (с.ғ.с.): «Сендердің ең жақсыларың – отбасысына жақсы болғандарың» – деп, отбасындағы көркем мінездің маңызын атап өткен.

 Дәстүр – тәрбиенің тірегі

Қазақ халқының салт-дәстүрлері Ислам құндылықтарымен тығыз байланыста дамыған. Үлкенді сыйлау, кішіге қамқор болу, жетім-жесірге жәрдемдесу, қонақжайлық – мұның бәрі шариғатпен үндес ізгі амалдар.

Мысалы:

Ата-ананы құрметтеу – діндегі парыз;

Туыстық қатынасты сақтау – сауапты іс;

Бата беру – дұға жасаудың көрінісі;

Садақа мен ас беру – қайырымдылықтың белгісі.

Дәстүр дінге қайшы келмесе, ол – құптарлық амал. Ислам ғұламалары «ғұрып» (қалыптасқан дәстүр) шариғатқа қарсы болмаса, ескеріледі деген қағиданы ұстанған.

     Отбасы – иман мектебі

Бала тәрбиесі ең алдымен отбасында қалыптасады. Әкенің жауапкершілігі – отбасының қорғаны болу, адал ризық табу. Ананың міндеті – ұрпақты имандылыққа, көркем мінезге баулу.

Отбасында:

Намаз үйретілсе – ұрпақ иманды болады;

Әдеп үйретілсе – қоғам көркейеді;

Бірлік болса – береке артады.

      Дін мен дәстүрдің үйлесімі

Қазақ «Дәстүрдің озығы бар, тозығы бар» дейді. Сондықтан әр дәстүр шариғат таразысымен өлшенуі керек. Егер дәстүр:

Ысырапқа,

Көрсеқызарлыққа,

Бәсекелестік пен мақтанға апаратын болса,онда ол Ислам әдебіне сай келмейді.

Ал ынтымаққа, сыйластыққа, қайырымдылыққа бастайтын дәстүр – дінмен үндес.

Отбасы – қоғамның іргетасы, ал дәстүр – сол іргетасты бекемдейтін рухани желім. Ислам діні отбасының беріктігін, ата-ананың құрметін, ұрпақ тәрбиесін басты назарда ұстайды. Сондықтан біз дәстүрімізді сақтай отырып, оны шариғат талаптарына сай дамытуымыз қажет.

Берекелі отбасы – берік қоғамның кепілі. Ал иман мен тәрбиеге негізделген шаңырақ – ұлттың болашағы.

Ержан Аманбаев

Тараз қалалық орталық Әулие ата мешітінің бас имамы