Жамбыл облысы Тұрар Рысқұлов аудандық «Сұлтан» орталық мешітінде Байзақ ауданының бас имамы, РАНТ мүшесі Қанат Жұмағұл жұма уағызын жүргізді. «Исламда жастар тәрбиесі» тақырыбында болған уағыз-насихатқа 500 ге жуық жамағат қатысып, рухани азық алды.

РАНТ мүшесі уағызында: «Жастық шақ – адам ғұмырының ең асыл, ең ардақты кезеңі. Бұл жүректің жалынға толы, ойдың өткір, рухтың сергек, арманның биік уақыты. Жастық шақ – өмірдің көктемі. Көктемде егілген дән ғана  күзде өнімін береді.

Сол себепті ислам тәрбиесі де жас буынды рухани кемелдікке бастайтын уақыт ретінде қарастырады. Жастар – ұлттың болашағы, елдің ертеңі. Сондықтан оларды имандылыққа, руханиятқа тәрбиелеу әр қоғамның ең басты міндеті.

Имандылық – адам бойындағы ізгілік пен әділдік, ар мен намыстың, сабыр мен қайырымдылықтың бастауы. Жастарға қамқор болу, олардың жүрегіне иман нұрын ұялату – ізгілердің жолы, салиқалы жандардың бағыты. Сол себепті де ардақты Пайғамбарымыз Мұхаммед (оған Алланың салауаты мен сәлемі болсын) үмбетін әрдайым жастарды дұрыс бағытқа бастауға шақырған. Себебі иманды жас – елдің тірегі, салиқалы, дұрыс қоғамның негізі. Ал тәрбиесіз, рухани құндылықтан ада ұрпақ – қоғамның әлсіреуіне бастайтын ең үлкен қауіп,- деп, кеңінен баяндап өтті.

Қуаныш Түзелбеков 

Рысқұлов аудандық мешіттің баспасөз қызметі