Қостоған ауылы «Ботбай баба» мешітінде  жамағаттың діни білімін жетілдіру мақсатында «Мұғалім Сәни» кітабы мен «Тәжуид ережелерін» оқыту дәрістері тұрақты түрде жүргізілуде. Бұл сабақтар жамағаттың Құран Кәрімді дұрыс әрі мәнерлеп оқуына, сондай-ақ діни сауатын арттыруға бағытталған.

Дәрістерді Еламан Бақытханұлы ұстаз жүргізіп, алдымен «Мұғалім Сәни» кітабындағы араб әріптерінің жазылуы мен дыбысталуын, харекеттер мен сөз құрау тәсілдерін үйретеді. Содан соң әр сабақта шәкірттер теориялық білімді жаттығулар арқылы бекітіп отырады.

Тәжуид ережелерін оқыту барысында  әріптердің  шығу орындарын, созу, үндестіру, жіңішке және қатаң айту қағидаларын түсіндіріп, қателерді түзетуге ерекше көңіл бөледі. Бұл жамағаттың Құранды қатесіз оқуға дағдылануына мүмкіндік береді.

Сабаққа жасөспірімдерден бастап үлкен кісілерге дейін қатысып, бір-біріне қолдау көрсетіп келеді. Жамағаттың айтуынша, бұл дәрістер олардың діни білімін ғана емес, рухани өмірін де байытып, Алла Тағаланың сөзіне деген сүйіспеншілігін арттыруда.

Меркі аудандық «Меркі ата» мешітінің баспасөз қызметі