Меркі ауданы «Жүніс молда» мешітінде жамағатқа арналып еліміздегі діни және ұлттық құндылықтарды насихаттайтын маңызды шара өтті. Жиын барысында Қазақстан Мұсылмандары Діни Басқармасының төл баспасы «MUFTIAT» баспасы шығарған  «Дін мен дәстүр III» кітабы таныстырылды.

Іс - Шарада мешіт ұстазы Еламан Бақытханұлы сөз сөйлеп, жиналған жамағатқа аталған еңбектің маңызы мен мазмұны жайлы кеңінен түсіндірді.  Кітапта ата-бабамыздан қалған асыл дәстүрлердің Ислам шариғатымен үйлесімі, рухани құндылықтарды сақтау жолдары, ұрпақ тәрбиесі мен имандылық қағидалары қамтылған.

 «Дін мен дәстүр» атты бұл еңбек – ұлттың ұйытқысы болған салт-санамызды діни тұрғыдан түсіндіріп, дәстүрлі құндылықтарды жаңғыртуға бағытталған. Мұнда ұлттық тәрбиеден бастап, отбасылық қарым-қатынас, адамгершілік, ізгілік, көрші ақысы, қонақ күту әдебі сынды көптеген тақырыптар қамтылған, – деді Еламан Бақытханұлы өз сөзінде.

Бұл игі шара – дін мен дәстүрдің сабақтастығын дәріптеп, ел бірлігі мен рухани тұтастығын нығайтуға бағытталған қадамдардың бірі болды.

Меркі аудандық «Меркі ата» мешітінің баспасөз қызметі